memo.laborunion.lt


66. (1441) Апрѣля Грамота Короля Казимира на Русскомъ языкѣ, чтобъ половину Серебщины плотили въ Трокахъ конецъ жидовскій, Ляхи и Русь и Жидова Татарове, a половину мѣсто на другой сторонѣ моста. Дана въ Гроднѣ.

Дата: 2006/9/26 | Раздел: СОБРАНIE ДРЕВНИХЪ ГРАМОТЪ И АКТОВЪ

66. Апрѣля Грамота Короля Казимира на Русскомъ языкѣ, чтобъ половину Серебщины плотили въ Трокахъ конецъ жидовскій, Ляхи и Русь и Жидова Татарове, a половину мѣсто на другой сторонѣ моста. Дана въ Гроднѣ.

/163/
      Казимир Божею млстыо корол полски велики кнзь литовски и руски кнжа пруское жомоитскии и иных.

      Воеводѣ троцкому пану радивону остиковч, маршалку земскому.
/164/
Жаловали нам жидова троцкая, штож дей за дяди нашего за великого кнзя витовта, и за жикгимонта, и за нас, коли положимъ на них серебщину нашу, и они плачивали нам половину серебщины нашее тот конецъ жидовский ляхове и русъ и жидова татарове, полебедный мостъ, а половину плачивало мѣсто на сей сторонѣ. Ино как бывало за дяди нашег за великог кнзя витовта и за жикгимонта , и за нас, как намъ плачивали серебщину нашу ляхове и русь и татарове ижидова на той сторонѣ лебедног мосту, и онибы нинѣ платили свою половину серебщины нашее, а половину бы мѣсто платило на сей сторонѣ, а будут ли мѣщане о том с ними которое дѣло мѣти, ино даст ли бгъ как мы будем оу великом княжствѣ литовском на потом, мы тог досмотрим, а тепере бы вси сполна обѣдве половици нам заплатила серебщины нашее немешкаюче.

псан оу городне. Април г (3) Индикт. г (3) (Подлин. на бумагѣ печатъ отпадшая).


Cтатья опубликована на сайте "memorandum":
http://www.tarnautojai.lt/memo

Адрес статьи:
http://www.tarnautojai.lt/memo/modules/myarticles/article.php?storyid=118